Rev 9 | MED | STEP | Wote na ndi, kundᵾr mel, anggelo 5 ei ndi, elim nga pikul ei, ik nduⱡnga kᵾn, muⱡ ila mipil ti, mᵾi ila mana urum. Wote, mᵾi ila kut mandpa tetᵾm ei nga kumba ki ei, elim nguⱡmina, mepa urum.

Revelation of John 9

Anggelo 5 Ei Ndi, Pikul Ik Ndurum

1 Wote na ndi, kundᵾr mel, anggelo 5 ei ndi, elim nga pikul ei, ik nduⱡnga kᵾn, muⱡ ila mipil ti, mᵾi ila mana urum. Wote, mᵾi ila kut mandpa tetᵾm ei nga kumba ki ei, elim nguⱡmina, mepa urum. 2 Ni kᵾn, mipil ni ndi, mᵾi ila kut ni, kumba tilinga kᵾn, ndip ikil mel mam mat, kut nila oⱡa omba kᵾn, ant ei kᵾn, kona kᵾpkᵾ raⱡ tᵾpa rumbᵾⱡ mundrum. 3 I elinga mel, ndip ikil oⱡa urum kona nila, uipᵾ goimba ou mat, mᵾi kona ila mana orung. Uipᵾ goimba ou mbᵾ, ronduⱡ ti ngurung ei, kimbuⱡa kelwa nga ronduⱡ ei mel kapⱡa. 4 Uipᵾ goimba ou mbᵾ, kundᵾk nᵾk mel, “Enim ndi, ui ongum na, nde na, wote mel mat, mᵾi kona mbila oⱡa orum mbᵾ, etᵾk kit mundi nᵾmᵾndᵾi, mon! Wamp mat, Got nga tip timal ei, mᵾi ombᵾl ila pi napᵾm wamp mbᵾ kandᵾk kᵾn, etᵾk kit mundᵾi!” nᵾtᵾng. 5 Wamp mbᵾ, etᵾk mindil nguk pangina, kalimp 5 omba pangga kᵾn, wote wamp mbᵾ, rok kundi nᵾkᵾndᵾi! Ni kᵾn, uipᵾ goimba ou nimbᵾ ndi, puk mᵾi kona mbila andᵾk wamp mbᵾ, etᵾk mindil kit mat nguing ei, kimbuⱡa kelwa ndi, wamp nomba mindil kundrum uⱡ ni mel etmba. 6 Ui ei kᵾn, wamp mbᵾ kuⱡing numan ei kandᵾk, timin nᵾk etᵾk, wote kandᵾk ti nᵾtᵾng. Ei kᵾn, wamp kuⱡi uⱡ ei ndi, wamp mbᵾ ropa kundi nᵾkᵾndᵾmba.

7 Na ndi, kᵾndᵾr mel, uipᵾ goimba ou mbᵾ, kng os na mat, el iting ping etmin uⱡ ni mel, tᵾk kun etᵾk morung. Peng mbila wᵾnᵾ gol mat mondrᵾng. Wote, kuimp keta mbᵾ, wamp nga kuimp keta ei mel titim. 8 Peng ndi mbᵾ, amp nga peng ndi, ni mel ruⱡ mbᵾ. Wote gu mbᵾ, kui laiyon na gu ni mel ᵾnggᵾtᵾm. 9 Pepil ombil mbila kapa mat, wal pᵾki mel pakᵾk, wote pou mbila, nung nung nitim uⱡ ei, kng os mat, el ila ping pilik, wil kar mel mat kundᵾk mek puⱡina, kᵾlkᵾⱡ nᵾtᵾm uⱡ ni mel itim. 10 Uipᵾ goimba ou nimbᵾ nga ᵾi mbᵾ, kimbuⱡa kelwa ei, wamp nomba mindil kundrum. Ni mel kapⱡa ᵾi ᵾnggᵾtᵾm. Ʉi ila ronduⱡ ti, tᵾk tek morung ei, wamp minal mindil ngangina, kalimp 5 omba mba ei nga ronduⱡ tᵾtᵾng. 11 Mel nimbᵾ nga nuim mumuk ti murum. Nuim mumuk ei, mᵾi ila kut ti mandpa tepa mba, pora ni nandᵾtᵾm ei nga anggelo ei. Ipru ik ila nga anggelo ei, mbi tek, Apandon, nᵾtmᵾn. Wote, Grik ik ila mbi tek, Apoliyon, nᵾtmᵾn. Ik ei nga puⱡ ei, wamp etpa kit mondrum anggelo ei.

12 Mbun mindil mam kuimp tepa ni pora nim. Enim pilᵾi! Wote, mbun mindil mam raⱡ omba uⱡ ei petᵾm.

Anggelo 6 Ei Ndi Pikul Ik Ndurum

13 Wote, anggelo 6 ni ndi, elim nga pikul ni ik ndurum. Ni kᵾn, Got nga kuimp keta ila, rat pol gol tetᵾm nilinga, kom tᵾmbᵾkak kat anggᵾtᵾm ila, ik ti ekit oⱡnga na pit. Ik ni ndi, anggelo 6 ei, pikul ambuⱡpa murum ni, kundpa nimba mel, “Nim ndi, anggelo tᵾmbᵾkak kat, kan manga Nu Yupretis ila petmin kᵾⱡ, tᵾkᵾn mundi!” nitim. 15 Ni kᵾn, mba anggelo tᵾmbᵾkak ni kᵾⱡ, tᵾpa munduⱡnga kᵾn ok, wamp mbᵾ, kᵾmp tᵾk rᵾⱡaip raldika endᵾk kᵾn, rᵾⱡaip tenda ti, rok kondrung. Wote, anggelo nimbᵾ ndi, tᵾk kun etᵾk, pora nduk molk kᵾn, ant mong ei kᵾn, kalimp ei kᵾn, pana ei kᵾn mint nokundᵾk molk, wote kongun ei etᵾng. 16 El wu mat, kng os mbuⱡ ila morung ei nga namba iti morung ei, na kundᵾk nilingina pit. Ei, wu 200 miliyon minal morung.

17 Na ur kump etᵾp kundᵾr mel, wu mat, kng os mbuⱡ morung nimbᵾ, wal pᵾki kapa kunt na, muk na, plawa kuk kᵾng ti na mat tᵾk pepil ila tᵾk ni, nduk pendᵾtᵾng ei, ndip mel kapⱡa. Kng os peng mbᵾ, kui laiyon nga peng ni mel kapⱡa. Ndip kou ikil kᵾn, ku salpa na mbᵾ, kng os keta min mbila, ndip nomba ekit omba, ndui nimba kona mbila elpa elpa purum. 18 I etᵾk kᵾn, wamp mbᵾ kᵾmp tᵾk, rᵾⱡaip raldika etᵾk rok kᵾn, wamp rᵾⱡaip tenda ti mel, raldika kit kᵾⱡ ndi, rok kondrung. Uⱡ ei, ndip kᵾn, ikil kᵾn, ku salpa na mbᵾ, kng os keta min ila ekit urum. 19 Ni kᵾn, kng os nimbᵾ nga ronduⱡ pitim ei, keta ila pepa ᵾi ila pepa itim. Wote, kng os ᵾi mbᵾ, wimbᵾ na ni mel, peng anggilpa itim ei ndi, wamp mbᵾ, etᵾk kit mondrung. 20 Wamp mat, kont morung nimbᵾ, numan ropᵾl rui narᵾk, wamp nga ki ila ambulk, mim etᵾng mel mbᵾ, ambulk gi nduk morung. Wote wamp mbᵾ, kur kit mbi paka rondᵾk, ku gol na, silpa na, bras na, ku na, nde na mbᵾ, mim etᵾng mel mbᵾ, mbi paka rondrᵾng. Mel mbᵾ ik pili napilik, ik ni nandᵾk, nombuⱡa ᵾndi nandᵾk etmin mel mbᵾ nga mint, pilik morung. 21 Wamp mbᵾ ndi, wamp mat rok kondᵾk mbᵾ, kupna ambulk, wapra rok wamp mat nga mel mbᵾ, kᵾndᵾp nok etᵾng. Wamp nimbᵾ, numan ropᵾl rui narᵾk kᵾn, uⱡ kit mbᵾ, tᵾk mbuⱡ nguk iti natᵾtᵾng.